ราชา อาห ภนฺเต นาคเสน กตีนิ นุโข โพชฺฌงฺคานีติ ฯ สตฺต โข มหาราช
โพชฺฌงฺคานีติ ฯ กตีหิ ปน ภนฺเต โพชฺฌงฺเคหิ พุชฺฌตีติ ฯ เอเกน โข มหาราช
โพชฺฌงฺเคน พุชฺฌตีติ ฯ กตเมน เอเกน โพชฺฌงฺเคน ภนฺเตติ ฯ ธมฺมวิจย-
สมฺโพชฺฌงฺเคนาติ ฯ อถ กิสฺส นุโข ภนฺเต วุจฺจนฺติ สตฺต สมฺโพชฺฌงฺคานีติ ฯ ตํ
กึ มญฺญสิ มหาราช ยถา อสิ โกสิยา ปกฺขิตฺโต อคหิโต หตฺเถน อุสฺสหติ เฉชฺชํ
ฉินฺทิตุนฺติ ฯ น หิ ภนฺเตติ ฯ เอวเมว โข มหาราช ธมฺมวิจยสมฺโพชฺฌงฺเคน วินา
ฉหิ โพชฺฌงฺเคหิ น พุชฺฌตีติ กลฺโลสิ ภนฺเต นาคเสนาติ ฯ

สตฺตโพชฺฌงฺคปญฺโห อฏฺฐโม

ฯ
ราชา อาห ภนฺเต นาคเสน กตมํ นุโข พหุตรํ ปุญฺญํ วา อปุญฺญํ
วาติ ฯ เถโร อาห ปุญฺญํ โข มหาราช พหุตรํ อปุญฺญํ โถกนฺติ ฯ กถํ ภนฺเต
นาคเสน ปุญฺญํ พหุตรํ อปุญฺญํ โถกนฺติ ฯ อปุญฺญํ โข มหาราช กโรติ วิปฺปฏิสารี
โหติ ปาปกมฺมํ มยา กตนฺติ เตน การเณน ปาปํ น วฑฺฒติ ปุญฺญํ โข มหาราช
กโรนฺโต อวิปฺปฏิสารี โหติ อวิปฺปฏิสาริตฺวา ปาโมชฺชํ ชายติ ปมุทิตสฺส ปีติ ชายติ
ปีติมนสฺส กาโย ปสฺสทฺธติ ปสฺสทฺธิกาโย สุขํ เวเทติ สุขิโต จิตฺตํ สมาธิยติ เตน
การเณน ปุญฺญํ วฑฺฒติ ปุริโส โข มหาราช ฉินฺนหตฺถปาโท ภควโต เอกํ อุปฺปลหตฺถํ
ทตฺวา เอกนวุติกปฺเป วิปากํ คจฺฉิสฺสติ อิมินาปิ โข มหาราช การเณน มยํ ภณาม
ปุญฺญํ พหุตรํ อปุญฺญํ โถกนฺติ ฯ กลฺโลสิ ภนฺเต นาคเสนาติ ฯ

ปาปปุญฺญพหุตรปญฺโห นวโม ฯ

ราชา อาห ภนฺเต นาคเสน โย วา ชานนฺโต ปาปกมฺมํ กโรติ โย วา
อชานนฺโต ปาปกมฺมํ กโรติ กตมสฺส พหุตรํ อปุญฺญนฺติ ฯ เถโร อาห โย โข มหาราช
อชานนฺโต ปาปกมฺมํ กโรติ ตสฺส พหุตรํ อปุญฺญนฺติ ฯ เอวํ โข ภนฺเต นาคเสน
โย หิ อมฺหากํ ราชปตฺโต วา ราชมหามตฺโต วา อชานนฺโต ปาปกมฺมํ กโรติ ตสฺส
มยํ ทฺวิคุณํ ทณฺฑํ ทเทมาติ ฯ ตํ กึ มญฺญสิ มหาราช ตตฺตํ อโยคุฬํ อาทิตฺตํ
สมฺปชฺชลิตํ สํโยชิตํ ภูตํ เอโก อชานนฺโต คณฺเหยฺย เอโก ชานนฺโต กตโม พาฬฺหตรํ
คณฺเหยฺยาติ ฯ โย โข ภนฺเต อชานนฺโต โส พาฬฺหตรนฺติ ฯ เอวเมว โข มหาราช
โยปิ อชานนฺโต ปาปกมฺมํ กโรติ ตสฺส อปุญฺญํ พหุตรนฺติ ฯ กลฺโลสิ ภนฺเต


ิ

นาคเสนาติ ฯ

ชานอชานปญฺโห ทสโม ฯ

ราชา อาห ภนฺเต นาคเสน อตฺถิ โกจิ อิมินา สรีเรน สทฺธึ อุตฺตรกุรุํ
วา คจฺเฉยฺย พฺรหฺมโลกํ วา อญฺญํ วา ปน ทีปนฺติ ฯ เถโร อาห อาม มหาราช
โส อิมินา จาตุมหาภูติเกน กาเยน อุตฺตรกุรุํ วา คจฺเฉยฺย พฺรหฺมโลกํ วา อญฺญํ วา
ปน ทีปนฺติ ฯ กถํ ภนฺเต อิมินา จาตุมหาภูติเกน กาเยน อุตฺตรกุรํ วา คจฺเฉยฺย
พฺรหฺมโลกํ วา อญฺญํ วา ทีปนฺติ ฯ อภิชานาหิ ตฺวํ มหาราช อิมิสฺสา ปฐวิยา วิทตฺถี
วา ลงฺฆยิตฺวา รตนฺโย วาติ ฯ ชานามิ ภนฺเต อหํปิเอว ภนฺเต อฏฺฐปิ รตนิโย
ลงฺฆามีติ ฯ กถํ ตฺวํ มหาราช อฏฺฐปิ รตนฺโย ลงฺฆสีติ ฯ อหํ ภนฺเต จิตฺตํ อุปาเทมิ
เอตฺถ อุปติสฺสามีติ สหจิตฺตุปฺปาโท กาโย ลหุโก โหตีติ ฯ เอวเมว โข มหาราช อิทฺธมา
ภิกฺขุ เจโตวสิปฺปตฺโต กาเย จิตฺตํ สมาโรปยิตฺวา จิตฺตภาวนาย เวหาํ คจฺฉตีติ ฯ กลฺโลสิ
ภนฺเต นาคเสนาติ ฯ

อุตฺตรกุรุปญฺโห เอกาทสโม ฯ

ราชา อาห ภนฺเต นาคเสน ตุมฺเห ภณถ อฏฺฐิกานิ ทีฆานิ โยชนสติกานีติ
รุกฺขานิปิ นตฺถิ โยชนสติกานิ กุโต ปน อฏฺฐิกานิ ทีฆานิ ภวิสฺสนฺตีติ ฯ ตํ กึ มญฺญสิ
มหาราช สุตํ เต มหาสมุทฺเท ปญฺจโยชนสติกา มจฺฉา อตฺถีติ ฯ อาม ภนฺเต สุตํ
เม มหาสมุทฺเท ปญฺจโยชนสติกา มจฺฉา อตฺถีติ ฯ นนุ มหาราช ปญฺจโยชนสติกสฺส
มจฺฉสฺส อฏฺฐิกานิปิ ทีฆานิ ภวิสฺสนฺตีติ ฯ กลฺโลสิ ภนฺเต นาคเสนาติ

ทีฆอฏฺฐิกปญฺโห ทฺวาทสโม ฯ

ราชา อาห ภนฺเต นาคเสน ตุมฺเหภณถสกฺกาอสฺสาสปสฺสาเส นิโรเธตุนฺติ ฯ
มหาราช สกฺกา อสฺสาสปสฺสาเส นิโรเธตุนฺติ ฯ กถํ ปน ภนฺเต สกฺกาติ ฯ ตํ กึ
มญฺญสิ มหาราช สุตํ เต โกจิ กากจฺฉมาโนปิ ฯ อาม ภนฺเต สุตนฺติ ฯ กินฺนุ
โข มหาราช โส สทฺโท กาเย ภมิเต วิรเมยฺยาติ ฯ อาม ภนฺเต วิรเมยฺยาติ ฯ
โส หิ นาม มหาราช สทฺโท อภาวิตกายสฺส อภาวิตสีลสฺส อภาวิตจิตฺตสฺส กาเย ภมิเต
วิรมติ กิมฺปน ภาวิตกายสฺส ภาวิตสีลสฺส ภาวิตจิตฺตสฺส จตุตฺถลฺฌานสมาปนฺนสฺส